Samsung Electronics, Samsung Health Monitor proqramındakı yuxu apnesi xüsusiyyətinin Amerika Birləşmiş Ştatları Qida və Dərman İdarəsindən (FDA) De Novo təsdiqini aldığını açıqladı. Samsung Galaxy Saatı və Telefonu ilə yuxu apnesi əlamətlərini aşkar edən bu xüsusiyyət ötən ilin oktyabrında Cənubi Koreyanın Qida və Dərman Təhlükəsizliyi Nazirliyi (MFDS) tərəfindən də təsdiqlənib.

Samsung tərəfindən edilən açıqlamalara görə yuxu apnesi xüsusiyyəti 22 yaşdan yuxarı istifadəçilərə xroniki yuxu apnesi diaqnozu qoyulmayanlar üçün iki gecəlik monitorinq müddətində orta və ya ağır dərəcəli obstruktiv yuxu apnesinin (OSA) simptomlarını aşkar etməyə imkan verir. Bu xüsusiyyətdən yararlanmaq üçün istifadəçilər on gün ərzində iki dəfə, hər biri dörd saatdan çox yuxularını izləməlidirlər. Bilməyənlər üçün deyək ki, Obstruktiv yuxu apnesi insanın yuxuda tənəffüsünün dayanmasına səbəb olur və tez-tez oksigen qəbulunda fasilələrə, zəif yuxu keyfiyyətinə və gündüz yorğunluğuna səbəb ola bilər. Müalicə olunmayan yuxu apnesi hipertoniya, koronar arteriya xəstəliyi, ürək çatışmazlığı, ürək aritmiya və insult kimi ürək-damar xəstəliklərinin riskini artıra bilər.
Samsung-un şərhinə görə, Samsung Health Monitor tətbiqinə daxil ediləcək yeni funksiya, daha çox insanın orta və ya ağır obstruktiv yuxu apnesi simptomlarını proaktiv şəkildə aşkar etməsinə və bu aşkarlama nəticəsində sağlamlıq fəsadlarının yaranma ehtimalını azaltmaq üçün tibbi yardıma müraciət etməsinə imkan yaratmaq məqsədi daşıyır.

Yuxunun sağlamlığımızdakı əsas rolunun fərqində olduğunu ifadə edən Samsung, daha yaxşı yuxu üçün üç əsas elementə diqqət yetirdiyini bildirir.
Qeyd edək ki, yuxu apnesi xüsusiyyəti üçüncü rübdə Samsung Health Monitor tətbiqi vasitəsilə ABŞ-da Galaxy Watch seriyalı saatlarda mövcud olacaq.